Сенад Мустафов, претставник на Ромскиот едукативен фонд, вели дека невклучувањето е последица на неповолната финансиска состојба кај многу ромски семејства, но и на нееднаквиот старт на децата во прво одделение, поради недоволното познавање на македонскиот јазик кај децата Роми. Токму затоа, вели Мустафов, во проектот се вклучени 18 негувателки од ромска националност, кои им помагаат на децата околу јазичните бариери.

Заменик министерот за труд и социјална политика, Ибрахим Ибрахими, исто така ја истакнува успешноста и важноста на овој зафат. Ибрахими додава дека со овој проект се помага и во надминувањето на поделбите во општеството и кај младите, со самото тоа што малите Роми се во мешани паралелки со други деца, каде се дружат и учат заедно едни од други и едни за други.

Децата Роми го учат македонскиот јазик, а останатите, преку нивните другарчиња, имаат можност да научат повеќе за ромската заедница, и да создадат перцепција која е поразлична од типичните, стереотипни претставувања, предрасуди и клишеа во однос на Ромите - дека се необразовани, нечисти, имаат вошки, крадат...

Елена Нешовска од Здружението на граѓани Сумнал, која го мониторира спроведувањето на проектот и поврзувањето помеѓу родителите, децата и градинката, вели дека за подобра едукација и информираност и на родителите се организираат работилници, преку кои тие се запознаваат со градинките, развојот кој му е потребен на детето, и правилните начини на воспитување и комуникацијата со најмладите.

Проектот е во завршна фаза, меѓутоа надлежните изјавуваат дека прават напори тој да продолжи, бидејќи позитивните искуства и резултати од претходните години, како зголемувањето на бројот на деца вклучени во образовниот систем и намалувањето на бројот на оние што не одат на училиште, се очигледни и неоспорни. Цел на сите вклучени институции и организации е во наредниот период бројот на децата Роми во градинките постојано да расте, а овој зафат да се прошири уште во неколку други општини од земјава.